Logo
2020 ජූලි මස 11 වැනි සෙනසුරාදා

තොණ්ඩමන්ගේ අවමගුලට ගිය මාධ්‍යවේදියෙකුට කොරෝනා යයි කී PHI සම්බන්ධයෙන් පරීක්‍ෂණ





ආරුමුගම් තොණ්ඩමන් මහතාගේ අවමංගල්‍ය උත්සවයේ මාධ්‍ය ආවරණය සඳහා සහභාගී වූ ප්‍රාදේශිය මාධ්‍යවේදියා කොවිඩි 19 වෛරසය වැළඳුන සැක සහිත ආසාදිතයෙක් බවට සෞඛ්‍ය අංශ නිලධාරියෙක් විසින් වගකීම් රහිතව මාධ්‍යට කරන ලද ප්‍රකාශය සම්බන්ධයෙන් කඩිනම් පරීක්ෂණයක් සිදු කරන බව නුවරඑළිය දිස්ත්‍රික් සෞඛ්‍ය සේවා අධ්‍යක්ෂ, වෛද්‍ය සේනක තලගල මහතා පවසයි.

නුවරඑළියේදී ඔහු මේ බව පැවසීය.

අදාල සෞඛ්‍ය අංශ නිලධාරියා විසින් ලබාදුන්නේ යැයි කියන තොරතුරු පදනම් කරගනිමින් පී.සී.ආර්. පරීක්ෂණ වාර්තාව ලැබීමට ප්‍රථම මෙම ප්‍රාදේශිය මාධ්‍යවේදියා කොරෝනා ආසාදිතයෙක් බවට සැකකරන බවට පවසමින් ඔහු සමග තවත් පුද්ගලයින් දෙදෙනෙක් ස්වයං නිරෝධායනයට ලක් කළ බවට පසුගියදා මුද්‍රිත හා විද්‍යුත් මාධ්‍ය මගින් ප්‍රචාරය වීම නිසා එම මාධ්‍යවේදීයා දැඩි අපහසුතාවයට හා මානසික පීඩාවට පත්ව සිටින බව පවසමින් එම සෞඛ්‍ය නිලධාරියාට එරෙහිව විනය පරීක්ෂණයක් පවත්වන ලෙස ඉල්ලමින් නුවරඑළිය දිස්ත්‍රික් ජනමාධ්‍යවේදීන්ගේ සංවිධානය මගින් දිස්ත්‍රික් සෞඛ්‍ය සේවා අධ්‍යක්ෂවරයා වෙත මාධ්‍ය සාකච්ඡාවක් ඉල්ලමින් ලිඛිතව කරන ලද ඉල්ලීමකින් අනතුරුව දිස්ත්‍රික් සෞඛ්‍ය සේවා අධ්‍යක්ෂ කාර්යාල රැස්වීම් ශාලාවේදී පැවති මාධ්‍ය හමුවේදී තලගල මහතා ඒ බව පැවසීය.

එහිදී වැඩිදුරටත් අදහස් දක්වමින් වෛද්‍ය සේනක තලගල මහතා මෙසේද පැවසීය ,

මෙම සෞඛ්‍ය නිලධාරියාගේ වගකිම් විරහිත ක්‍රියාදාමය හේතුවෙන් අපහසුවට පත්වූ මාධ්‍යවේදීයා සම්බන්ධව නුවරඑළිය දිස්ත්‍රික් ජනමාධ්‍යවේදීන්ගේ සංගමයට වෙත තම කණගාටුව ප්‍රකාශ කරන බව පැවසු වෛද්‍ය අධ්‍යක්ෂවරයා, සෞඛ්‍ය නිලධාරියා සම්බන්ධයෙන් මධ්‍යම පළාත් සෞඛ්‍ය අධ්‍යක්ෂවරයා වෙත කරුණු වාර්තා කර ඇති බවත්, ඒ අනුව ඉදිරි ක්‍රියාමාර්ග ගන්නා බවත්, ඒ සම්බන්ධය මාධ්‍ය දැනුම්වත් කිරිමට පියවර ගන්නා බවත්ය.

කොවිඩ් 19 වසංගත තත්ත්වයක් පවතින මෙවැනි අවස්ථාවක තහවුරු කරගත් කරුණු පදනම් කර නොගනිමින් මාධ්‍යට තොරතුරු ලබාදීමේදී බරපතල ගැටලු රැසක් උද්ගතවන බවද වෛද්‍ය අධ්‍යක්ෂවරයා මෙහිදී අවධාරණය කළේය.

ඇතැම් විද්‍යුත් හා මුද්‍රිත මාධ්‍ය මගින් මෙම සිද්ධිය සම්බන්ධව කරුණු වාර්තා කිරීමේදී කටයුතු කර ඇති ආකාරය සම්බන්ධව රජයේ ප්‍රවෘත්ති අධ්‍යක්ෂවරයා වෙත අද (05) දා ලිඛිත දැනුම්දීමක් කළ බවද සෞඛ්‍ය සේවා අධ්‍යක්ෂවරයා පැවසීය.

සිද්ධියට සම්බන්ධ නුවරඑළිය දිස්ත්‍රික් ප්‍රාදේශිය මාධ්‍යවේදියාගේ පී.සී.ආර්. පරීක්ෂණයෙන් ඔහු කොරෝනා ආසාදිතයෙක් නොවන බවට ලද වෛද්‍ය වාර්තාවේ පිටපතක් මෙහිදී අදාල මාධ්‍යවේදියාට නුවරඑළිය දිස්ත්‍රික් ප්‍රාදේශිය වසංගත රෝග විශේෂඥ වෛද්‍ය මධුර සෙනවිරත්න මහතා විසින් භාර දෙන ලදී.

මෙම අවස්ථාවට නුවරඑළිය දිස්ත්‍රික් ප්‍රාදේශිය වසංගත රෝග වේදඥ වෛද්‍ය මධුර සෙනවිරත්න මහතා හා නුවරඑළිය දිස්ත්‍රික් ජනමාධ්‍යවේදීන්ගේ සංගමයේ නිලධාරීන් ඇතුලු මාධ්‍යවේදීන් පිරිසක් සහභාගී වූහ.

මස්කෙළිය ගාමිණී බණ්ඩාර ඉලංගන්තිලක
– ADA






Helabima. All rights Reserved.

Copyrights protected: All the content on this website is copyright protected and can be reproduced only by giving due courtesy to 'helabima'