Logo
2020 මාර්තු මස 31 වැනි අඟහරුවාදා

බටහිර ගැත්තන්ගේ ඉංග්‍රීසි මිත්‍යාව

නිරෝධ රණසිංහ


මුළු දේශීය අධ්‍යාපන ක්‍රමය ම ඉංග්‍රීසියට හැරවීමට එරෙහි වන අයට ඒ වෙනුවෙන් පෙනී සිටින මහා විද්වතුන්ගේ ප්‍රමුඛතම ඡෝදනාවක් වී ඇත්තේ මේ රටේ දරුවන් ළිං මැඩියන් කිරීමටත්, ඉංග්‍රීසි නූගන්වා කොන් කිරීමටත්, ඊනියා බමුණු කුලය පවත්වාගෙන යාමටත් අර එරෙහි වන්නන් කුහක කමින් පෙනී සිටින බව ය. එකම කතාව බණ්ඩාරනායක සිංහලෙන් උගන්වා තම දරුවන්ට ඉංග්‍රීසියෙන් ඉගැන්වූ බව ය. එහෙම ජාත්‍යන්තර මෙව්වා එකෙන් ඉංග්‍රීසි උගත් බණ්ඩාරනායකගේ දරුවන් රටට කළ සේවය ගැන ඉතිං අමුතුවෙන් කියන්නට ඕනෑ නැත.

මෙවැනි තකතීරු අමන ගෝෂා වලට පිළිතුරු දීම වත් වැඩක් නැති වුව ද, මෙතෙක් කාලයක් අනිවාර්යය විෂයයක් වශයෙන් ඉගැන්වීමෙන් පසුවත් අපේ දරුවන් එම භාෂාව සඳහා මේ තරම් පසුගාමී වීමට (මේ කියන තරම් පසුගාමී බවක් මම නම් නොදකිමි. මෙරට දරුවන්ගේ ඉංග්‍රීසි දැනුම සාපේක්ෂව හොඳ තැනක පවතී) හේතුව කුමක් දැයි සොයා බැලිය යුතු ය. එසේ අසමත් වී ඇත්නම්, එසේ වීම තුළම කියැවෙන කාරණය නම් ප්‍රශ්නය ඇත්තේ ඉංග්‍රීසි ඉගැන්වෙන ක්‍රමය තුළ මිස වෙන බක්කක නොවෙන බව ය. ඒත් හොරාට නිදන වුන් ඇහැරවීමට බැරි ය. කතාව එසේ පවතින පසුබිමක අනෙකුත් විෂයයන් ද ඉංග්‍රීසියෙන් ම උගන්වන්නට යාමෙන් අර දරුවන්ට කෙරෙන යහපත කුමක් දැයි මට නම් නොතේරෙයි. මුලින් කළ යුත්තේ, දැන් ඉංග්‍රීසි ඉගැන්වීමේ ඇති ප්‍රශ්න විසඳා බැලීම මිස අනෙකුත් විෂයයන් ටිකත් එතැනට ම ඇද දැමීම නොවේ. කොහෙන් කිව්වද එසේ කර දරුවන් (විශේෂයෙන්ම ශාස්ත්‍රීය හැකියාවන්ට වඩා ශිල්පීය දක්ෂතා ඇති දරුවන්) සමස්තයක් ලෙස ඉගෙනීමට උකටලී කිරීමෙන් අර කියන බමුණු ශ්‍රේණිය රැකීම වඩා පහසු ය. කාර්‍යක්ෂම ය.

ඉංග්‍රීසි හැකි වූ පමණින් විශේෂ කුසලතාවයක් නම් ලැබෙන්නේ නැත. ඉංග්‍රීසි දුර්වල, එහෙත් තාක්ෂණික ව අතිශය දක්ෂ,සාර්ථක මිනිසුන් මෙන් ම ඉංග්‍රීසිය ම මිස වෙන කිසිවක් බැරි අසාර්ථක ජීවිත ද ඕනෑතරම් සිටියි. කළ යුත්තේ දරුවන්ට සරලව භාෂා මෙවලමක් වශයෙන් ඉංග්‍රීසි ඉගැන්වීමට ක්‍රම සකස් කිරීම ය. ඉංග්‍රීසි චතුර භාවය සහ මිනිසෙකුගේ රැකියා, තාක්ෂණික හෝ කළමනාකරණ කුසලතාවය අතර ඇති අමුතු සම්බන්ධයක් නැත. තරමක ඉංග්‍රීසි දැනුමක් සමග වඩා වැඩි දැනුම් සමුදායයක් වෙත දොරටුව විවර වන බව සත්‍ය නමුත්, ඉංග්‍රීසි හැකියාව පමණක් ඒ දැනුම් පිපාසය ඇති නොකරයි. මා විශ්වවිද්‍යාලයේ උගන්නා කාලයේ අපට අන්තර්ජාල පහසුකම් නොමිලේ ලැබී තිබිණි. ඉන් සිය තාක්ෂණික දැනුම, නිර්මාණශීලිත්වය සහ දැනුම වර්ධනය වෙනුවෙන් සේවයක් කරගන්නට කාලය වැය කළ ශිෂ්‍යයන් කොපමණ සිටියේ ද සහ ඔවුන්ගෙන් කී දෙනෙකු (මා ද ඇතුළු ව) ඉංග්‍රීසියේ ප්‍රවීණයන් වී දැයි මට හොඳින් කිව හැකි ය. දැනුම සොයා යාමේ ආශාව ඇති කිරීමට ඉංග්‍රීසි උගත්කමෙන් අමුතු අනුබලයක් නොලැබේ.

දැන් වසර 20කට වැඩි කාලයක් ජාත්‍යන්තර පාසල් ඔස්සේ බිහි කෙරී ඇති ඉංග්‍රීසි උගතුන්ගේ ප්‍රමාණය බැලූ විට අප රටක් වශයෙන් සූ ගා නව විද්වතුන් බිහිකෙරී තිබිය යුතුය. ඒත් අවාසනාවකට තවමත් හරි හමන් විද්වතෙකියි කිව හැකි හැම මිනිසෙක් ම බිහිකෙරී ඇත්තේ ස්වභාෂා/ද්විභාෂා උගතුන් අතරිනි. මෙරට ජාත්‍යන්තර අධ්‍යාපන ආයතන වල පූර්ණ ඉංග්‍රීසි ඉගැන්වීම ගැන කිවයුත්තක් ම නැත. අවශ්‍ය කෙනෙකුට ඒ දරුවෙකු සමග කතා කර ඒ මට්ටම දැක ගත හැකි ය. අවුරුදු ගාණක් එවැන්නක උගන්වා අත්දැකීම් ඇති මට ඒ ගැන කතන්දර සීයක් ලිවිය හැකි ය.

මේ ප්‍රාඥයන්ගේ දෙවෙනි කතාව ඊට එරෙහිව ජර්මනිය, කොරියාව වැනි නූතන රටවල් උදාහරණ කර නොගන්නා ලෙස ය. වඩා හොඳ ය. අපිට දැන් සියරාලියෝන්, ඝානා, නයිජීරියා සහ ලයිබීරියාව වැනි රටවල් ගැන කතා කළ හැකිය. මේ රටවල් දන්නා කාලයක පටන් රාජ්‍ය භාෂාව සහ ප්‍රධාන ඉගැන්නුම් භාෂාව ලෙස ඉංග්‍රීසිය භාවිතා කරන රටවල් වේ. ඒත් මේ රටවල් වල ජනවර්ග, ඉන් උරුම කරගෙන සිටින විශේෂ සහජීවනයක් හෝ ආශ්චර්යජනක මානව සංවර්ධනයක් ඇත්දැ'යි ඕනෑ කෙනෙක්ට සොයාබැලීමට ඉඩක් ඇත.

මේ යෝජනාව ජාතිවාදී ප්‍රශ්නයට පළාත් සභා යෝජනා කිරීම තරමේ ම විසඳුමකි. දරුවන්ට කැමැත්ත ඇති වන පරිදි ඉංග්‍රීසි පමණක් නොව වෙනත් භාෂා වුව ඉගැන්වීම ඉතා වැදගත් බව විශ්වාස කරමි. ඒත් ඒ කළ යුත්තේ බලෙන් ගිල්ලවීමෙන් නොවේ. තම තමන්ගේ ජීවිත වල අසාර්ථකත්වයට ඉංග්‍රීසි නූගැන්වීම මුලට පෙන්වීම තේරුමක් නැත. මොවුන්ට අයින්ස්ටයින් ලා, ෆයින්මාන් ලා හෝ කියුරි ලා වීමට බැරිවී ඇත්තේ ඔක්කොම ඉංග්‍රීසියෙන් නූගැන්වීම නිසා ය (ඒ කී එකෙක්වත් ඉංග්‍රීසියෙන් උගත් මිනිසුන් නොවීම ම වෙනම කතාවකි). අපි නොදන්න මොණරතැන්න තමා ය. අනෙක් අතට ප්‍රමාණවත් ගුරුවරුන් සහ හරිහමන් ඉගැන්වුම් ක්‍රමවේද වැඩිදියුණු නොකර මෙවැනි තීරණයකට සහාය දීමට හොඳ සිහියෙන් නම් බැරි ය. නාගරික, පහසුකම් සහිත පාසලක මෙන්ම ග්‍රාමීය පාසල්වල ද ඉගෙන ගෙන ඇති මට ඒ පාසල් වල ගුරුවරුන්ගේ ආකල්ප සහ සහ ඉගැන්වුම් ක්‍රමවේද ගැන හොඳ අත්දැකීම් තිබේ.

ඊනියා බමුණු කුලය බිඳීමට සැබෑ අවශ්‍යතාවයක් වෙත්නම් කළ යුත්තේ ස්වභාෂා වලට ඊට අදාල අගය කිරීම ලබා දී ප්‍රමාණවත් පරිදි ඉංග්‍රීසි ඇතුළු වෙනත් භාෂා, සන්නිවේදන මෙවලම් ලෙස ඉගෙනීමට අවශ්‍ය පහසුකම් කාර්‍යක්ෂමව ලබා දීම ය. එසේ නොකර ඉංග්‍රීසිය යනු සර්වරෝග විනාශක, සර්වතෝභද්‍ර මහෞෂධය කැ'යි ලෝකයේ නැති ගාම්භීරත්වයක් ඊට බලෙන් ආරෝපණය කිරීමෙන් ලබාගත හැකි ජාතික ප්‍රගමනයක් නම් නැත.

- නිරෝධ රණසිංහ







Helabima. All rights Reserved.

Copyrights protected: All the content on this website is copyright protected and can be reproduced only by giving due courtesy to 'helabima'